Yangiliklar


315

Xalqqa xizmat qilish – oliy saodat

Bugun odamlarning dunyoqarashi, hayot tarzi o‘zgarmoqda. Huquqiy tafakkuri oshib, o‘z haqini talab qilishni o‘rganmoqda. Xalq vakillari – deputatlarning ham masʼuliyati oshib, saylovchilari manfaatidan kelib chiqqan holda faollik ko‘rsatayotgan deputatlar safi tobora kengaymoqda. Keling, “Milliy tiklanish” partiyasining Navoiy viloyatidagi deputatlari faoliyati misolida buni bir tahlil qilaylik.

 

Partiyadan saylangan navoiylik 80 nafar deputat tomonidan shu yilning o‘tgan 9 oyi davomida yuborilgan 447 ta deputatlik so‘rovining aksariyati o‘z yechimini topdi. Sessiyaga kiritilgan masalalar soni 27 ta, doimiy komissiyalar yig‘ilishlariga olib chiqilgan takliflar 106 tani tashkil qildi. Shuningdek, 71 nafar mansabdor shaxsning hisoboti eshitildi.

 

Partiyaning Navoiy viloyati Kengashi raisi, xalq deputatlari viloyat Kengashi deputati Ilhom Rajabov bu borada hamkasblariga o‘rnak bo‘lmoqda. Deputat sessiyaga,  doimiy komissiyaga kiritilgan masalalar bo‘yicha yetakchi. Shuningdek, deputatlik so‘rovlari bilan necha yillardan buyon taʼmir ko‘rmagan ko‘chalarga asfalt yotqizildi, elektr taʼminoti, ichimlik suvi muammolari hal qilindi. Piyodalar, ayniqsa, yosh bolalarning harakat xavfsizligini taʼminlash maqsadida ayrim chorrahalarga svetofor o‘rnatildi.

 

“Suv keltirgan elda aziz” deganlaridek, viloyat Kengashidagi yana bir deputat Feruza Fayziyeva chekka qishloqlar aholisini ichimlik suvi bilan taʼminlashda faollik ko‘rsatib, el duosini olmoqda. Yaqinda deputat tomonidan Nurota tumani 58-Bobur saylov okrugidagi ichimlik suvi muammosi ham hal qilindi. Gap shundaki, 3 yil avval ushbu mahallaning asosiy ko‘chasi bo‘ylab tortilgan quvurdan “obi hayot” kelmay qo‘ydi. Oqibatda aholi sarson bo‘lib, tuman markazidagi chashmadan suv tashiy boshladi. Deputat tashabbusi bilan ushbu masala viloyat Kengashining 18-sessiyasida ko‘tarilib, muammo  tezda hal qilindi.

 

Navoiy kon-metallurgiya kombinati 5-Kon boshqarmasi direktori, viloyat Kengashi deputati Valijon Nazarovning faoliyati ham eʼtirofga loyiq. Ayniqsa, “Zafarobod” va “Ko‘kcha” mahallalaridagi “Ayollar va yoshlar daftar”lariga kiritilgan fuqarolarni ish bilan taʼminlash va kasb o‘rgatish, ijtimoiy himoyaga muhtoj oilalar muammolarini hal qilishda faol. Jumladan, deputat saʼy-harakati bilan ochilgan bepul o‘quv kurslarida 34 nafar yoshlar avtomobil taʼmirlash ustachiligi va oshpazlik kasbini o‘rganib, bugun xalq xizmatida. Deputat yaqinda issiqxona ochish istagida bo‘lgan F.Tog‘ayevaga kredit olishda ko‘maklashdi. 

 

Tuman va shahar Kengashlariga saylangan deputatlar orasida ham saylovchilar ishonchini oqlayotgan xalq vakillari soni ko‘paymoqda. Bunda partiyaning Navbahor tuman Kengashidagi sakkiz nafardan iborat deputatlik guruhi faoliyatini alohida qayd etish lozim.

 

O‘tgan yili deputatlik guruhi tomonidan tuman Kengashi sessiyalariga 9 ta tashabbus-masala kiritilgan bo‘lsa, joriy yilning 9 oyida bu ko‘rsatkich 11 tani tashkil qildi. Doimiy komissiya yig‘ilishlariga esa 47 ta taklif olib chiqilib, 23 nafar mansabdor shaxsning hisoboti eshitildi. Turli tashkilotlarga esa 88 ta deputatlik so‘rovi yuborildi. Shu o‘rinda, tuman Kengashi deputatlari saʼy-harakati bilan “MengiTekstil group” MCHJ tomonidan tikuvchilik sexi tashkil etilgani va xotin-qizlar uchun 400 ta yangi ish o‘rni yaratganini  alohida qayd etish lozim.

 

Partiyamizning Saylovoldi dasturida xotin-qizlar va yoshlar o‘rtasida hunarmandchilik, oilaviy tadbirkorlik, kasanachilikni rivojlantirish orqali ularni ish bilan taʼminlashni kengaytirishga qaratilgan tashkiliy-huquqiy shart-sharoitlarni yaratish ustuvor vazifa sifatida belgilangan. Shundan kelib chiqib, viloyat Kengashi deputati Otabek Mustaqimovning amaliy ko‘magi bilan Zarafshon shahriningDaugistau” qo‘rg‘onida ishsiz xotin-qizlar bandligini taʼminlash maqsadida “Marjon-Xushnud” tikuvchilik markazi ishga tushirildi. Avvalo qo‘lida hunari yo‘q ayollarga tikuvchilik sirlari o‘rgatildi va so‘ngra markazga ishga qabul qilindi.

 

Navro‘z umumxalq bayrami arafasida Navbahor tumani Kengashi deputati Lochin Oblaqulov tashabbusi bilan dasht hududidagi Oqtepa mahallasida 10 gektarlik bog‘ yaratildi.

 

Viloyat Kengashi deputatlari Jobir Temirov, Mashhura Karimova, Valijon Nazarov, Navoiy, Zarafshon va G‘ozg‘on shahar Kengashlari deputatlari Anora Bobomurodova, Surʼat Sharipov, Laylo Tursunova, Mashʼal Qodirov, Karmana, Navbahor, Nurota va Uchquduq tuman Kengashlari deputatlari Gulnoza Shermatova, Abdukarim Saksonov, Farhod Ermakov, Rayhon Qodirova kabi fidoyi deputatlarimiz ham odamlarning haqli eʼtirozlariga sabab bo‘layotgan muammolarga yechim topishda faollik ko‘rsatmoqda.

 

Nafʼing agar xalqqa beshakdurur,

Bilki, bu nafʼ o‘zingga ko‘prakdurur.

 

Alisher Navoiy bobomizning ushbu misralarini bekorga yodga olmadik. Afsuski, deputatlarimiz orasida o‘z xizmat vazifasiga sovuqqonlik bilan munosabatda bo‘layotgan loqaydlar ham bor. Qariyb ikki yillik faoliyati davomida Karmana tuman Kengashi deputati Husen Ismatov, Nurota tumani Kengashi deputati Mukarram Yuldoshevalar tomonidan bironta deputatlik so‘rovi chiqarilmaganini qanday baholash mumkin? Deputatlik maqomiga noloyiq bunday insonlar faol deputatlar yutug‘iga ham soya solmoqda.

 

Ayni paytda bunday deputatlar faolligini oshirish bo‘yicha harakatlar boshlangan va tez orada ular ham xalq manfaati yo‘lida tinim bilmayotgan xalq vakillari safiga kirishiga ishonamiz. Zero, deputat uchun xalqqa xizmat qilish oliy saodatdir.

 

Jamoliddin AHTAMOV,

“Milliy tiklanish” demokratik partiyasi

Navoiy viloyati Kengashi bosh mutaxassisi,

O‘zbekiston Jurnalistlari ijodiy uyushmasi aʼzosi