Yangiliklar


293

Aybdorlarni emas, avvalo sababini qidirishimiz kerak

Inson yaratilibdiki, o‘rganish, rivojlanish va o‘sishdan to‘xtagani yo‘q. Shu kungacha qilingan barcha kashfiyot va olamshumul yangiliklarning ortida ham albatta inson turibdi. Afsuski, ularning jabrini tortayotgan ham insonning o‘zi bo‘lib qolmoqda.

Texnologiyalar asrida yashayapmiz. Internetsiz hayotimizni tasavvur ham qilolmay qoldik. Uning yordamida dunyoda sodir bo‘layotgan muhim yoki ahamiyatsiz xabarlar bilan har kuni, har daqiqada tanishib boryapmiz. Har o‘nta xabarning beshtasida yo oilaviy mojarolar oqibatidagi qotillik yoki o‘z joniga qasd qilish holatlari kuzatilyapti.

Farg‘onada totalizatorlik sabab yuz bergan mudhish voqeylikni ham shular qatoriga qo‘shish mumkin va ushbu viloyatda istiqomat qilayotgan bir fuqaro sifatida bu hodisa meni ham jiddiy tashvishga soldi.

Mamlakatimizda bukmekerlik faoliyati noqonuniy hisoblanadi. Maʼmuriy javobgarlik to‘g‘risidagi kodeksning 191-moddasi (qimor va tavakkalchilikka asoslangan boshqa o‘yinlar), shuningdek, Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish)ga binoan bu turdagi faoliyat noqonuniy hisoblanadi.

Aslini olganda keng jamoatchilik tomonidan bunday noxush holatlarning asosiy sababchisi deb hisoblanayotgan 1xbet, FONBET, Winline yoki faqat bukmekerlik faoliyati bilan shug‘ullanayotgan qo‘shtirnoq ichidagi tadbirkorlarga qo‘yilayotgan ayblovlar qanchalar to‘g‘ri?

Maʼlumki, har bir davlatning o‘z huquq-tartibot organlari bor va ular bizdan ko‘ra ko‘proq bunday suitsid holatlarni keltirib chiqarayotgan sabablarni o‘rganadi. Yuqoridagi onlayn o‘yinlarning hech birida o‘z joniga qasd qilish bo‘yicha ko‘rsatmalar berilmasligi aniq. Inson irodasizlik qilib, boshiga tushgan arzimas sinovlarni deb, umriga, hayotiga zomin bo‘layotgan bo‘lsa, biz aybdorlarni emas, avvalo shunga olib kelayotgan sabablarni qidirishimiz kerak. Yaʼni, mehnat qilmay oson va tez pul topishni o‘ylab, shunday ishlarga qo‘l urayotgan yoshlarning ko‘payayotgani bu taʼlim-tarbiyadagi kemtiklar bilan bog‘liq emasmi?

Bugun yoshlarimizga bilim olishi, til o‘rganishi, kasb-hunarli bo‘lishi uchun neki zarur bo‘lsa, barchasi yaratilgan. Bunday imkoniyatdan unumli foydalanayotgan yoshlar tobora ko‘paymoqda. Ammo ayrim yoshlarimiz esa vaqtini, pulini keraksiz, zararli o‘yinlarga sarflab, hatto jinoyat ko‘chasiga kirib qolmoqda.

Mutaxassislar tavakkalchilikka asoslangan bunday o‘yinlar insonda umidsizlikni keltirib chiqarishi, sog‘ligi bilan bog‘liq turli muammolarga duchor bo‘lishini isbotlagan. Katta mablag‘idan ayrilgan odam tinchini yo‘qotishi va alal-oqibat bu yuqoridagi kabi ayanchli holatlar bilan ham yakun topishi mumkin.

Shunday ekan, farzandlarimiz xatti-harakatiga befarq bo‘lmaylik. Avvalo bolalikdan ularning qo‘liga kitob berib, taʼlim-tarbiyasiga jiddiy eʼtibor qarataylik. Zero, ertangi kunimiz qanday bo‘lishi bugun farzandlarimizga g‘amxo‘rligimiz bilan bog‘liq. Yaʼni, nima eksak, shuni o‘rib olamiz.        

 

Abror HUSAINOV,

“Milliy tiklanish” demokratik partiyasi Farg‘ona viloyat Kengashi raisi o‘rinbosari