O‘zgarishlarga befarq bo‘lishga haqqimiz yo‘q!

Mamlakatimizda so‘nggi yillarda xalqimiz manfaati yo‘lida amalga oshirilayotgan islohotlarni tahlil qiladigan bo‘lsak, haqiqatan ham davlatimiz Bosh Qonunini o‘zgartirish hayotiy zaruratga aylanganga guvoh bo‘lamiz.

Tan olaylik, so‘nggi olti yilda barcha sohalarda muhim o‘zgarishlar amalga oshirilib, xalq davlat idoralariga emas, balki davlat organlari xalqimizga xizmat qilishi, inson qadrini ulug‘lash, huquq va manfaatlarini himoya qilish, odamlarning ertaga emas, bugun ham yaxshi yashashi uchun munosib sharoitlar yaratish davlatimiz siyosatining bosh maqsadiga aylandi.

Qisqa vaqt ichida erishilgan yutuqlar, iqtisodiyotimizni erkinlashtirish bilan bog‘liq muhim yangiliklar, odil sudlov, so‘z va eʼtiqod erkinligining taʼminlanishi, yaxshi yashashimizga, rivojlanishimizga to‘siq bo‘layotgan yuzlab cheklovlarning olib tashlanishi, umuman Yangi O‘zbekiston islohotlarining huquqiy asosini belgilash nafaqat bizning, kelajak avlodlarning ham emin-erkin hayot kechirishini kafolatlaydi.

Shu maʼnoda, konstitutsiyaviy islohotlarga shu yurt, shu Vatan fuqarosi sifatida hech kimning befarq bo‘lishga haqqi yo‘q.

Konstitutsiyani tayyorlashda dastlab loyiha ishlab chiqildi. Xalq muhokamasiga qo‘yilib, 200 mingdan ortiq taklif va mulohazalar olindi. Shundan kelib chiqib, loyihadagi moddalar soni amaldagi 128 tadan 155 taga, normalar soni 275 tadan 434 taga oshdi. Asosiy Qonun matni qariyb 65 foizga o‘zgarmoqda. Loyihani ishlab chiqishda 200 ga yaqin davlatlar tajribasi o‘rganildi. Olti turdagi ekspertizadan o‘tkazildi.

Yangilanayotgan Konstitutsiyada jamiyatimizning hech bir qatlami manfaati eʼtibordan chetda qolmadi. Bu xalqimizning Yangi O‘zbekistonni qurish g‘oyasi atrofida jipslashgani, birlashganidan dalolatdir. Shu jihatdan qaraganda, yangilanayotgan Bosh Qomusimiz haqiqatan ham Xalq Konstitutsiyaga aylanishi shubhasiz.

Norbobo SOATOV,
partiyaning Sirdaryo viloyati
Kengashi raisi