Har bir shaxsning huquq va erkinliklari kafolatlanmoqda

Ma’lumki, Mamlakatimizda so‘nggi yillarda xalqimiz manfaati yo‘lida amalga oshirilayotgan islohotlar jarayonida davlatimiz Bosh Qonunini o‘zgartirish hayotiy zaruratga aylanganiga guvoh bo‘lishmiz. Tan olish kerak, so‘nggi olti yilda barcha sohalarda muhim o‘zgarishlar amalga oshirilib, xalq davlat idoralariga emas, balki davlat organlari xalqimizga xizmat qilishi, inson qadrini ulug‘lash, huquq va manfaatlarini himoya qilish, odamlarning ertaga emas, bugun ham yaxshi yashashi uchun munosib sharoitlar yaratish davlatimiz siyosatining bosh maqsadiga aylandi.

O‘tgan qisqa vaqt ichida erishilgan yutuqlar, iqtisodiyotimizni erkinlashtirish bilan birgalikda odil sudlov, so‘z va eʼtiqod erkinligini taʼminlanishidagi yangiliklar, yaxshi yashashimizga, rivojlanishimizga to‘siq bo‘layotgan yuzlab cheklovlarning olib tashlanishi, umuman Yangi O‘zbekiston islohotlarining huquqiy asosini belgilash nafaqat bizning, kelajak avlodlarning ham emin-erkin hayot kechirishini kafolatlaydi.

Shu maʼnoda, konstitutsiyaviy islohotlarga shu yurt, shu Vatan fuqarosi sifatida hech kimning befarq bo‘lishga haqqi yo‘q.

Konstitutsiyada O‘zbekiston – suveren, demokratik, huquqiy va ijtimoiy davlat ekani qat’iy belgilab qo‘yilmoqda. Bunda kuchli ijtimoiy himoya va muhtojlarga ga‘mxo‘rlik – davlat siyosatining muhim yo‘nalishi bo‘lib qoladi. 

Yana bir muhim jihat, Konstitutsiyada har kimning uy-joyli bo‘lish huquqi belgilanmoqda. Ushbu normaning amal qilishi esa har bir fuqaro, jumladan, yosh oilalalarning o‘z boshpanasiga ega bo‘lishini ta’minlab, kishilarning hayotdan rozilik darajasini oshiradi.

Bundan tashqari, hech kim sudning qarorisiz va qonunga muvofiq holda uy-joyidan mahrum etilishi mumkin emasligi, uy-joyidan mahrum etilgan mulkdorga uy-joyning qiymati hamda u ko‘rgan zararlarning o‘rni qonunda nazarda tutilgan hollarda va tartibda oldindan hamda teng qiymatda (bozor qiymatida) qoplanishi ta’minlanishi kafolatlanmoqda.

Yangilanayotgan Konstitutsiyada jamiyatimizning hech bir qatlami manfaati eʼtibordan chetda qolmayotganligini alohida e’tirof etish lozim. Bu xalqimizning Yangi O‘zbekistonni qurish g‘oyasi atrofida jipslashgani, birlashganidan dalolatdir. Shu jihatdan qaraganda, yangilanayotgan Bosh Qomusimiz haqiqatan ham Xalq Konstitutsiyaga aylanishi shubhasiz.

Do‘smurod Toshev